قلب جديد

يا ترى إيه إحساسكم لما تمتلكوا شئ جديد ..؟؟

شقة ..عربيه ..وظيفه..مكافأه ..ملابس جديده

شايفين فرحة الطفل الصغير لما يجيب هدوم العيد الجديده !

الفرحه دى والمعنى الراقى ده لمشاعر الفرحه وصفها الرسول(صلى الله عليه وسلم) قبل كده فى الحديث الشريف

( إن الإيمان ليخلق فى جوف أحدكم كما يخلق الثوب ، فاسألوا الله أن يجدد الإيمان فى قلوبكم ) أخرجه الحاكم وصححه الألبانى

طيب عاوزين نسأل بعض شويه أسئله بصدق ..

يا ترى دروس التذكير بالاستعداد لرمضان صارت مكرره علينا

كلام الوعظ والتذكير معدش بيأثر فينا ؟

عنينا جمدت ومبتتأثرش بكلام ربنا فى القرآن لما يتلى علينا ؟

طيب عجبتنا المواعظ وسمعنا كلام كتير عن رمضان بس مفتقدين لحظة البدء ؟

لو كنا كده يبقى احنا محتاجين قلب جديد نفرح بيه زى ما الطفل الصغير بيفرح بالحاجه الجديده ..

عاوزين نجدد الدوره الإيمانيه كلها ،

زى ما جسمنا فيه شرايين وأورده متصله بالقلب فالإيمان كده برضه بيأثر فى حياة القلب ويجدد انشراح الصدر وينعش الروح.

نبدأ سوا بحاجه بسيطه بس غاليه أوى ..

الاستغفار والتوبه ..

خلى ذكر ربنا دائما فى بالك وتذكره بالاستغار كلما تذكرت ذنب فعلته ..اللهم تب علينا توبه نصوحا ترضيك وترضى بها عنا .

واما نبدأ فى تطهير قلبنا لازم نعرف إيه الحجات الدخيله علينا اللى أفسدته وخليته بعيد عن ربنا ..

قال ابن القيم ( وأما مفسدات القلب خمسه ..كثرة المخالطه ،التمنى،التعلق بغير الله ،الشبع ، المنام )

1_ كثرة المخالطه :القعده مع الناس كتير ،والتأثر بيهم وبأفكارهم وخاصة قرناء السوء فكم جلبت من نقمه ..ودفعت من نعمه .. وأنزلت من محنه ..وعطلت من منحه !!وان اضطرينا للجلوس معهم فلنجتهد أننا نحول المجلس لقعده ذكر ترضى ربنا عننا وتحفنا الملائكه

2_التمنى :أمانى دنيويه كلنا بنفكر فيها مش الغلط اننا نفكر الغلط انها تشغلنا عن طاعتنا .

3_التعلق بغير الله :والمثال المشهور فى سننا وفتره الجامعه اللى عايشينها اللى يتعلق بواحده واللى تتعلق بواحد حبته.. لو عاوزين نعيش رمضان صح بقلب جديد نسيب بعض ومنفتكرش غير حاجه واحده بس رضا ربننا عننا ولو مكتوب لنا الخير هييسره لينا

4

_الطعام :اطمنوا مش هنجوع يعنى .. بس مش هنشبع برضه قال رسول الله (صلى الله عليه وسلم)(ما ملأ آدمى وعاء شر من بطنه ، حسب الآدمى لقيمات يقمن صلبه ،فإن غلبت نفسه فثلث للطعام ، وثلث للشراب ، وثلث للنفس )أخرجه بن ماجه وصححه الألبانى

5_النوم :فإنه يميت القلب ويثقل البدن ويضيع الوقت ويورث الغفله ..أفضل الأوقات .. نوم أول الليل ونوم وسط النهار وكلما قرب النوم من طرفى النهار قل نفعه وكثر ضرره وما قاله الأطباء : أنفع أوقات النوم مقدار 8 ساعات فى نصف الليل الأول وسدسه الأخير .

غرف القلب الأربعه : الثقة ، الجمال ، التبتل ، الذل

الأذين الأيمن :الثقه

فليكون عندنا ثقة ، فى الله سبحانه وتعالى ، فى كتابه الكريم ، فى الرسول (صلى الله عليه وسلم) فى شريعة الإسلام بحلالها وحرامها

البطين الأيمن : الجمال

إن الله جميل يحب الجمال ..وأكيد ربنا مش هيكره لنا نجيب ثوب جميل أو حذاء جميل حتى لو غال ،لكن المقصود هنا جمال الروح ،جمال الأخلاق ، جمال الكلام ، جمال القلب ،جمال الطلب ، جمال ردود الأفعال ،جمال تلقى القضاء والقدر

الأذين الأيسر :التبتل

وهو الانقطاع إلى الله سبحانه وتعالى سئل أبى سليمان الدارانى (رحمه الله )ما أقرب ما يتقرب به العبد إلى الله ؟ فبكى وقال : أو مثلى يسأل عن هذا ؟ثم رفع رأسه وقال : أقرب ما يتقرب به العبد إلى الله أن يطلع على قلبك وأنت لا تريد من الدنيا والآخره إلا هو .

البطين الأيسر :

الذل اللهم اجعلنا أذل خقلك لك وأفقر خلقك إليك ،وعشان نبقى أذله لله طول السكوت ، التواضع والتوكل والرضا بقضاء الله ....

يتبــــــــع،،،

رمضــــان ....بحــــــــر

رمضان ..

نغمض عنينا ونتذكر مع بعض أيام رمضان اللى فاتت وأحوال المؤمنين فيها والروح الإيمانيه السائده ونسايم الحب

والرحمه اللى بتفوح منها

مش حاسين إن رمضان بكل اللى فيه من خيرات يشبه البحر ،البحر الواسع تسير عليه الفلك بالمنافع ،يسكن فى قاعه اللؤلؤ والمرجان وبينهما تسبح الخيرات (اللحم الطرى)،

كل شئ فى البحر كثيررمضان كده برضه مليان خير، لياليه زى اللؤلؤ والمرجان تحمل عتق وغفران سماء

البحر :النجوم ،، وسماء رمضان :ملائكه تنزلت لسماع القرآن

اللحم الطرى فى البحر يشبه العبادات السهله الجميله فى رمضان اللى بتوصلنا لرضا ربنا

بس للأسف مش كل اللى بيركب البحر بينجو ،كتير داخلين مش عارفين طريقهم رجعوا تانى ووصلوا لنقطه البدايه من مكان ما بدأوا

ورمضان كده برضه لا يدركه إلا اللى بيحدد هدفه ويعرف طريقه .

عن أبى هريره أنه سمع رسول الله (صلى الله عليه وسلم) يقول :آمين آمين آمين فقيل له :يا رسول الله ما كنت تصنع هذا ؟ فقال: قال لى جبريل عليه السلام : رغم أنف عبد دخل عليه رمضان ولم يغفر له ..فقلت :آمين .

وعلشان منكونش من اللى سيد البشر صلى الله عليه وسلم أمن عليهم يلا بينا نعيش رمضان صح .

ونقود سفينتنا صح ..

قواعد الإبحــــار:

القاعده الأولى :

حدد هدفك

قال عمر بن الخطاب (رضى الله عنه ) :إنى لأرى الرجل ليس فى شئ من أمور الدنيا ولا فى شئ من أمور الدين فيسقط من عينى .

يا ترى مستنيين رمضان ليه ؟علشان الأكلات اللى عمرها ما اتعملت الا فيه .علشان لمة العيله والعزومات علشان المسلسلات الجديده اللى اعلاناتها نازله قبلها من تلات أربع شهور ولا علشان دورات الكره اللى بتتسابق الأنديه بها فى ذلك الشهر العظيم ؟؟

دول تلاتين يوم بس يا جماعه مش قادرين نبعد فيهم عن الحجات اللى فاتت دى لازم نحدد هدفنا قبل ما ندخل رمضان ونجمع أهدافنا كلها فى حاجه واحده بس ( رضا ربنا والعتق من النار) وساعتها نكون حققنا المراد .

القاعده الثانيه

أصلح السفينه

زى ما السفينه مينفعش تطلع بالثقوب اللى مالياها وبالحمل التقيل اللى عليها ،احنا كمان لازم نصلح العيوب اللى مليانا واللى بتعوقنا عن أى عمل طاعه زى ،_احنا بنفتر بسرعه_بننشغل بالناس_مترددين_بنتأثر بكلام الناس_مبنكملش العمل للآخر_بننشغل بالدنيا زياده عن اللزوم_بتغلبنا شهواتنا وهوانا

والعيوب دى أكيد مفيش حد لا يخلو منها وطبيعى السفينه عمرها ما هتقدر تسير فى البحر بيهم قال رسول الله صلى الله

عليه وسلم ( إياكم ومحقرات الذنوب ،فإنهن يجتمعن على الرجل حتى يهلكنه )

القاعده الثالثه :

اختر قائدا ورفقه

مينفعش نسافر لواحدنا فى السفينه ، البحر كبير وواسع ، عاوزين اللى يعيننا ،صحبه خير حوالينا تشجعنا وتعطينا دفعه للأمام ، نتسابق فى ختم القرآن ، نذهب مع بعض للصلاه ..ونعيش رمضان سوا

القاعده الرابعه :

أسرع بالليل

قال (صلى الله عليه وسلم )عليكم بالدلجه فإن الأرض تطوى بالليل ما لا تطوى بالنهار ..أخرجه أبو داوود وصححه الألبانى والدلجه هى الظلام والليل

والمقصود هنا قيام الليل والدعاء فى الأوقات المتأخره بالليل

القاعده الخامسه

أمواج فى الطريق

البحر مليان أمواج هتعترض طريقك وبقوتك وقوة إيمانك هتتغلب عليها بإذن الله قال ابن القيم (رحمه الله ) الوصول إلى المطلوب مرهون بثلاث : هجر العوائد وقطع العلائق وتخطى العوائق

العوائد : ودى الحجات اللى اتعودنا عليها قبل رمضان أو حتى اللى اتعودنا عليها فى رمضان اللى قبل كده : نفطر وناكل ونشوف المسلسلات وننام حتى العبادات اللى كنا بنعملها فى رمضان اللى قبل كده نحاول نعملها بنيه جديده وقلب صافى مش عاوزين رمضان يبقى زى أى رمضان نحاول كل سنه يبقى أحلى من اللى قبله ..

العلائق : ودى الذنوب اللى متعلقه بينا ومش راضيه تسبنا زى شخص مثلا كان متعلق بالنظر إلى أى شئ حرام سواء فى التلفزيون أو فى الشارع وجه رمضان وعمل كل حاجه تمام التمام لكن غض البصر مش قادر يعمله لأنه اتعلق بيه فلازم نقوم نفسنا على الانضباط ونحفظ جوارحنا

العوائق:وهم الأشخاص ،، يعنى ناس زينا ميهماش غير انها تحبط الناس اللى حوليها وتهبط عزيمتهم مثلا انت معزوم عند العيله فى إحدى العزومات والمسلسلات بعد الإفطار شغاله على آخره وانت كنت عزمت انك مش هتضيع وقتك فيها فى رمضان يقولولك هما وإيه يعنى ده مسلسل محترم ازاى متتفرجش عليه ما كل الناس بتتفرج .؟!

نبدأ نضع القواعد قدام عنينا علشان نعيش رمضان أجمل من اللى فات

الفكره مقتبسه من كتاب ( قلب جديد ..لمن يريد ) للشيخ : محمد حسين يعقوب

أحب أن أهنئكم بقدوم الشهر الكريم ،

اللهم بارك لنا في ما تبقى من شعبان وبلغنا رمضان

كل عام وأنتم بخير