كأس إفريقيا..علمنى الكثير

ألف مبرووووووك لكل المصريين ،،

فعلاً والله وعملوها الرجاله ،،

شايفين الفرحه فى عيوننا عامله إزاى ،، كأن الناس مش لاقيه حاجه تفرح فيها ،،

كل الدنيا حواليهم مضلمه ، فما بيصديقوا يلاقوا حاجه يفرغوا فيها الكبت بتاعهم ،

تلاقيهم طالعين فى الشوارع يعبروا عن فرحتهم بأى شكل من الأشكال ولا هاممهم ،،

سبحان الله مع إنى مليش فى الكوره ولا بفهم فيها حاجه ،

بس البطوله دى بصراحه كنت متابعاها باستمرار ،،

أومال إيه مش كاس إفريقيا

والدنيا هتبقى مقلوبه فى البيت..

وبجد بحمد ربنا انى اتفرجت عليها لأنى اتعملت منها حجات كتيره أوى على الرغم انى معرفش أى حاجه عن قواعدها وأحكامها ،،

فى بدايه البطوله كنت ببقى مستغربه جداً للكثير من الدعاه،،

والله جزاهم الله خيراً ده أكيد وأعرف انهم افقه مننا وأعلم بأحكام الدين ،،

لكن اللى بيزعلنى انهم يطلعوا على شاشات التلفزيون ومواقع النت المختلفه بيستنكروا بشده البطوله لأ بيسنكروا رياضة كرة القدم من أصله !!

بعيد عن كل الحجات دى وبعيد عن فتوى الدعاه،،

نفسى أقول للناس كلها الرياضه مش مجرد مشاهده عقيمه مش انى اتفرج على اللاعب ده واعرف اخبار ده واشوفهم وهما بيجروا وخلاص..

بالعكس والله الرياضه دى وخاصة البطوله اللى فاتت أفادتنى كتير جداً و نفسى أقللكم الحجات الى اتعملتها واللى لازم كلنا نتعلمها ونتحلى بيها ،،

روح الجماعه ،،

أجمل روح والله ،

حب الغير وإنكار الذات

كله فى سبيل المصلحه العامه ،،

فرحه بتجمعهم بعد كل مباراه

لا ده بعد كل هدف

كله فرحان كأن كل واحد بيعتبر نفسه هو اللى جاب الهدف

لعيبه تقعد فى الاحتياطى متلعبش علشان تسيب الفرصه لغيرها وللى هى حاسه انهم هيقدروا أفضل منها على اللعب بكفاءه

وفيه لعيبه ملعبتش خالص بس الروح الصافيه ممزوجه بالفرحه بتتحسسهم انهم على أرض الملعب ،،

إخلاص النيه ،،

ليلة المباراه النهائيه عرفت إن أبو تريكه جمع اللعيبه كلهم ،، عارفين ليه ؟

علشان مفيش عمل من غير نيه وإذا فسدت النيه فسد العمل ،، والحمد لله العمل نجح لما أخلصوا نيتهم وجمعوا كلمتهم وهدفهم فى حاجه واحده بس هى إسعاد 75 مليون مصري ياما عانوا وياما تعبوا !!

شايفين حتى النيه عامله إزاى ،،

فى أصعب مواقفهم همهم إسعاد أهاليهم وشعبهم

شايفين هما فى إيه ولا فى إيه ؟

إخلاص العمل ،،

تدريب متواصل بعد كل مباراه لحد المباره اللى بعدها

شقا وتعب وإرهاق ،،

إصرار وعزيمه وصبر،،

تفاؤل وأمل ،،

كلله فى النهايه الكاس والبطوله

أجمل فرحه ،،

سجدة شكر بيختموا بيها كل مباراه ،

شفتوا الروح الإيمانيه العاليه فى المنتخب ،،

عجبنى جدا اللاعب أحمد فتحى اما سجل الهدف فى مرمى كوت ديفوار واللعيبه بتجرى عليه علشان تحضنه

قالهم إيه وأكيد كلنا لاحظناها " اسجدوا الأول "

وكلهم سجدوا ع الأرض شاكرين واحمدين ربنا وتوفيقه ليهم فى كل مباراه وكل هدف بيجيبوه ،،

وموقف تانى لللاعب أبو تريكه فى المباراه النهائيه لما الأمور اتأزمت والماتش بقى صعب ومش قادرين يسجلوا أهداف

واللعيبه بدأت تفقد أعصابها هو معملش غير حاجه واحده رفع إيديه فى السما وبدأ يدعى " يا ربـــ"

وربنا فعلا متخلاش عنه وهو اللى فرحنا وأحرز هدف البطوله ،،

إنذار شرف ،،

غزه فى أزمه ،،

حبايبنا وأخواتنا عايشين أيام صعبه هناك ،،

إيه رأيكم فى لاعب مشغول بالتدريب والبطوله وكمان فى غانا مش هنا فى مصر يخاف على أهالى غزه ويطلب مننا ان احنا نتعاطف معاهم ومش مننا احنا بس ده أعلنها قدام الجميع العالم كله شافها ،

واحنا الى قاعدين جنبها مش قادرين نتحرك ولا نتكلم كلمه !!!

ياااااه ،، بعد كل ده ومتعلمناش حاجه ولسه فيه حجات اكتر بتبان مع المواقف وبنشوفها كلنا ،،

عارفه انكم حسيتوا بنفس الإحساس اللى حسيت بيه وانتوا بتتفرجوا ،،

لأننا كلنا مصريين وكلنا مسلمين ومصر ربت فينا أصاله،،

نيلها وزع علينا طيبه نفوس وروح صافيه،،

الروح اللى خلتنا كلنا نطلع فى الشوارع نشيد باللى اخواتنا عملوه ،

روح خلتنا ننزل دموع الفرحه بعد كل هدف بيجيبوه

روح جمعت طوائف الشعب المختلفه مسلمين وأقباط

أغنياء وفقراء حكومه ومعارضه

روح نزلت كتير من بيوتهم علشان يستقبلوا اللعيبه فى المطار

روح خلتنا نتمنى اننا نكون فى غانا هناك على أرض الملعب نشاركهم فرحتهم ،،

الله عليكى يا بلدنا

والله نفسى اغنى واكتب واقول للعلم كله المصريين أهمه .. حيويه وعزم وهمه ،،

كان نفسى أكون مع اللعيبه فى غانا

كان نفسى استقبلهم فى المطار

كان نفسى اكون جنبهم افرح بفرحتهم

واكيد فيه كتير غيرى نفسهم فى كده

صحيح مقدرتش أقابلكم وأكون جنبكم،،

لكن ربنا أعلم بالفرحه اللى فى قلبى ليكوا عامله إزاى ،،

بحبك يا مصر ،،

وهفضل أحبك ،،

طول ما لسه فيكى ناس مصريين بجد ،، بيحبوكى ويخافوا عليكى ويحققوا ليكى أجمل أفراح وأعياد ،،

دمتِ بخير يا وش الخير ،،

صفحة بيضاء

أحمدك يا رب

فقد لبيت دعوتى وأسعدت سريرتى

لطالما دعوتك بأن تعود إلى

وها هى عادت

سمعت صوتها أخيراً

بعد طول انتظار وطول اشتياق

ها قد طلع النهار واختفى دجى الليل العميق فى الآفاق

***

كنت على يقين بأن صداقتنا لن تنتهى

وأنها ستزال

باقيه خالده رغم كل العقبات التى واجهتها

والتى لا أدرى حتى الآن ما سببها أنا أم أنت

أم هو ذاك القدر الذى شاء أن يفرق بيننا

ولكن

لا أريد أن ألومك على ما بدر سابقاً

اطمئنى

سأنسى كل شئ

لا أريد أن أتذكره

تأكدى أن الأيام ستمحى كل ما فات ولن يبق بالقلب لكِ إلا كل رائع ونبيل

معشوقتى ؛

لكِ أن تعلمى أنى كنت أبحث عنكِ دوماً

كنت أراكِ فى كل شئ

كتبى

كراستى وأوراقى

كان اسمك لا يزال محفوراً بين جنباتى

كان ينتظر بلهفة تلك اللحظه التى ستعودى فيها إلى وتسمعينى صوتك

حبيبتى؛

هيا لنعلن حبنا سوياً أمام كل البشر

هيا نجلس معاً

وننسى الماضى

ونسطر صداقتنا فى صفحة جديدة بيضاء

عنوانها الحب والنقاء

ونزيل من هامشها كل ما قابلناه من عناء

حبيبتى ؛

لن أنساكِ أبداً

أحبكِ جداً

أحلى حــياه

لما تكون الدنيا بخير
والعصافير حواليك بتطير
والورد بيضحك ويميل
تبقى فعلاً أحلى حياه

لما تلاقى أعز حبايبك
راجع مــ الغربه كمان جايلك
ويقللك فينك يا واحشنى
وتقلله فــ قلبى أنا شايلك

لما أقوم أتوضا تملى
وأفرش سجادتى وأصلى
وأدعى كمان وكمان وكمان
وأفوض أمرى لله



أحــــلى حياه

لما أسمع صوت طفل جميل
بيأذن فى طلوع الليل
أردد وراه اللى يقوله
وبحس إن الدنيا بخير



لما أعمل نفسى شطوره
وأقوم أفتح نور الأباجوره
وأمسك أوراقى وأقلامى
وأذاكر وكتابى قدامى
وقمرى يشوفنى ويقللى
صدقينى دى أحلى حياه


لما ألاقى فارس أحلامى
جاى بحصانه يقف قدامى
وياخدنى ونطير على فوق
جنب النجمه نعيش وندوق
أحلى حياه



فيارب متحرمنيش منها
نفسى أعيش ويا أحلامها
وأصاحب طيرها وحمامها
وأقطف من أزهارها الحلوه
زهره جميله وأعمل غنوه
وأشيل عنها أى آهات
وأألف فيها حكايات
على كل حكايه عنوان
(نفسى أعيش أحلى حياه

وحشتنى أيامك يا معرضنا ..

بصراحه كانت أجمل أيام قضتها السنه دى كانت فى رحابه

،،

المعرض ككل وليس أسرتنا فقط ،،

شاركت فى كذا معرض قبل كده ، بس دى أول مره أنا اللى أشتغل بإيدى ،،أعلق حاجتى بإيدى وأزوقها بإيدى ،،فعلا بيبقى ليها طعم تانى خالص



اكتر حاجه عجبتنى ، روح الجماعه وأنا بحب الجو ده جدا سواء كانت مسابقات أو حفلات أو غيرها ،،


أجمل حاجه أن كل شخص فى المعرض كان بيشتغل ونيته خالصه بجد لله مش عشان أى حاجه تانيه ،،

كان كل همى وأنا بشتغل إن ربنا يفرح مننا أوى ،،طول ما احنا عندنا فكره ،، موهبه،،رسمه ،، كلمه مفيده ،،وعاوزين نطلعها للناس عشان تستفيد منها أكيد ربنا هيقف معانا



كنت ببقى سعيده جدا لما أشوف الفرحه فى عيوننا كلنا اما ننجز شئ معين وخاصه مقرره الأسره والمقرره المساعده جزاهم الله عنا خيراً،، بجد أحسبهما على خير أكتر اتنين تعبوا فى المعرض والحمد لله فرحوا جدا بنتيجة تعبهم ،،










كان إحساس جميل جدا أما بشوف ناس مكانش ليهم فى شغل المعارض أو الحجات دى وأول ما شافونا ايجوا اشتغلوا معانا واحده ورا واحده والله كنت بحس إن ربنا بيبعت لنا الناس عشان تساعدنا








اكتر شئ اتعلمته ان الناس بجد كلها مش زى بعضها ،،
مش نفس الثقافه،، مش نفس الاهتمامات ،، مش نفس مستوى التفكير. ومفروض وظيفتنا فى المعرض اننا نلائم بشغلنا كل تلك الشخصيات ونعرف نتعامل معاهم كلهم على اختلافهم ،،

والله وأنا بفرجهم هنا فى البيت على تفاعل الطلبه معانا كنت سعيده جدا،،
وأنا بوريهم بصمات مختلفه لشخصيات مختلفه شاركت معانا برسمه أو بيت شعر فى المسابقه بجد الحجات دى هتفضل معايه وهتبقى أجمل ذكرى المعرض سابهالى ،








جناح حب الرسول بحس بروحانيه عاليه جدا وأنا بقرأ تعليقات كل اللى كتبوا فيه بجد بحس ان كل اللى كتب الكلام طالع من قلبه ع الورقه علطول كانت أجمل لحظه صدق الواحد قضاها فى المعرض




متتخيلوش أنا كنت بفرح أد إيه إما بسمع كلمة شكر أو إشاده من إداره رعايه الشباب أو الطلبه أو أى حد بيشوف المعرض ،، وساعتها بحمد ربنا وبقول الحمد لله الشغل بتاعنا طلع بفايده ونتيجه مثمره ،،

بشكر كل اللى ساهم معانا من الأسر الأخرى وبقللهم جزاكم الله كل خير على مساعدتكم لينا ،،


وبشكر أى حد مش شرط من أعضاء الأسره بس شارك معانا وتفاعل معانا فى التعليقات أو المسابقات أو غيرها ،،




شكلى طولت كتير ،،بس والله أنا نفسى أكتب كلام أكتر وأكتر ،،


يا رب ده كان أول عمل لينا يا ريت تفرح بيه يا ريت تفرح بينا ،،

ده مسجد والله ...مش حضانة أطفااال !!

بووووووم

الحمد لله أخيراً المدفع ضرب والواحد هجم على الأكل كأنه بقاله سنه مأكلش

بعد ما خلصنا الفطار قمت أنا وأخواتى وماما علشان نصلى المغرب جماعه


(طبعاً الواحد قام بالعافيه انتوا عارفين كبسة الأكل بقى


وهنا بدأت المشاجرة الكبرى على صلاة العشاء والتراويح .. أين سنصلى اليوم ؟


ريحانه عاوزه تروح المسجد البعيد لأن صوت الإمام حلو وفيه خشوع

وروز عاوزه تروح المسجد القريب عشر دقايق كعابى كده ، وده علشان كل صحباتها بتروح تصلى هناك وعاوزه تشوفهم تحكيلهم على التقرير اليومى المفصل بتاعها من ساعة ما سابتهم

وماما حبيبة قلبنا يا دوبك عليها تنزل سلم بيتنا علشان تروح تصلى فى المسجد الصغنون اللى لازق فينا


وأنا واقفه محتاره ما بينهم ، مش عاوزه أروح مع ريحانه لأنى بصراحه مش مستعده لمشوار الألف ميل ده
(صحيح ليته كان بعيداً لكن أنا مش قادره والله

ومش هروح مع ماما ده أكيد لأن الإمام بيقول بسرعه جداً ومش بيمشى بترتيب المصحف .

المهم صفيت فى النهايه على روز ووصلنا المسجد الحمد لله بسلام آمنين

طبعاً روز استعدت للسلامات والحوارات أول ما شافت صحباتها ،



_ إزيك يا روز ؟
حلوه العبايه الى جايه بيها دى

(مش عارفين أنها شحتاها من أختها




(2)



_فطرتى إيه النهارده
_احنا عندنا عزومه بكره
_ ياريت الإمام يخلص بسرعه علشان مسلسل قضية رأى عام


_يلا يا بنات الصلاه هتبدأ


رحت وقفت جنب روز وصحباتها فى الصف التانى
" أمرى لله هما لكاكين أينعم بس الصلاه بتهدى


قعدنا نساوى فى الصفوف ساعه ، فجأه يطلعونى قدام .. يرجعونى ورا .. لأ العمود فى نص الص مينفعش اطلعوا تانى وهكذا إلى أن بدأ الإمام ( الله أكبر


وهنا بدأت المعاناه .. من حسن حظى كان واقف جنبى فى الصلاه من الناحيه التانيه ست كبيره ومعاها حفيدها


أهو أخينا ده بقى ضيع عليا صلاة العشا كلها
فجأة ألاقيه جايب الكرسى يحطوا قدامى وأنا بسجد
يشد فى الإسدال بتاعى
يلعب فى الشراب

لأ وكله كوم وأنه ياخد محفظتى ده كوم تانى

(ده فيها مصروف الأسبوع كله ..!! هئ هئ



وفضل كده لحد ما لقيت الإمام فجأه بيقول السلام عليكم
" آاااه .. ضاااعت الصلاه

قلت لروز

_ روز أنا هرجع ورا
ضحكت روز لأنها فهمت أنا عاوزه أرجع ورا ليه


رجعت تقريباً الصف الخامس وقلت فى نفسى
"الله الصف ده حلو ،، كلهم بنات قمامير زيى ،، شكلهم كده ملحقوش يجيبوا عيال

بعد ما خلصنا السنه ،بدأ الإمام فى التراويح




(3)




ويا دوبك لسه بيقرأ سورة الفاتحه وإذ بطابور من الأطفال يخترق الصف جنبى
( يا ربـــى .. تاااانى .. أستغفر الله العظيم

حاولت أركز مع الإمام لحد ما الركعتين الأولانيين يخلصوا والأمور تتحل

بعد ما انتهينا من الركعتين قعدت أدور على صف فاضى خالص مفيهوش أطفال

بصراحه بعد طول عناء ..ملقتش غير الصف الأخير كان فاضى خالص

قلت يلا بقى أمرى لله أرجع ورا وألحق آخد شويه ثواب فى بقية التراويح .
( طبعاً كل الى فى المسجد متعجب من البنت اللى واخده سياحه كده

وبدأنا الركعتين التانيين على بركة الله ،
الله أكبر ،
وكانت المفاجأه


( كوكو بان كوكو بان كل حى فى مكان

أصل العيال بيلعبوا استغمايه ورايه !!
لأ وإيه أنا كنت الحيطه اللى بيستخبوا وراها !!

ضيعتم عليا الصلاه حرام عليكو ، أعمل إيه بس ، أسيبلكوا المسجد وأطلع !!

منك لله يا روز ، انتى السبب ، مبسوطه انتى مع صحباتك يا ختى ، كان زمانى رحت مع ريحانه وريحت دماغى ع الأقل كنت هاخد ثواب

واستكملت الصلاه على مضض راضيه بأنى أكون حيطه ليهم ،
بس بعد كده هيتكشفوا علشان معادوش هيلاقوا الحيطه دى هنا تااانى



تـــــــــــــمت