Friday, November 23, 2007

ميشو!! زيزو!! مين دووول؟

بعد ما خلصنا المحاضره
،، والواحد مش قادر عاوز يطلع يشم نفسه شويه ،،


إيجت الأخت ورده وقالتلى : فله حبيبتى انتى وراكى حاجه الوقتى


إحم إحم ،،لا يا جميل (طبعا مش هقوللها ورايه شويه هوا عاوزه أشمهم ) ،،

بس هو انتى عاوزانى فى حاجه ؟!


أها ،،تعالى بس أعرفك على أصحابنا ،،

أوى أوى ( وأنا بقى ما بصدق ،،بحب فرص التعارف دى جدا )



أهم واقفين هناك تعالى ياللا..


قعدت أبص يمين وشمال أدورع البنات اللى عاوزه تعرفنى عليهم مش لاقيه حد غير شويه شباب كده واقفين هناك ،،



هما فييين ؟



أهه ميشو هناك وزيزو معاه



ميشو ...!!! زيزو...!!مين دوووول ؟! استنى ....



(
آاااه طبعا اصدمت وخاصة إنى كنت لسه فى أول سنه ليا فى الكليه ومش متعوده على الجو ده خالص)


ودار الحوار بين ورده وبينهما ،،

إزيك يا ميشو ؟ عامل إيه ؟ بجد والله وحشتنى ،،بقالى يومين مشفتكش ،

وهاتك يا ضحك ،،وهاتك يا ابتسامات ،،

(
وصاحبتكم فله المسكينه واقفه حاطه راسها فى رجليها ومش عارفه تعمل ايه ؟)



أها صحيح أعرفك بقى يا ميشو ،، دى فله صحبتنا


(
نعم ،، صاحبه مين ،،أنا صحبتك انتى بس ،، لازمه نا دى إيه ؟ مش عارفه والله !!)




أهلا يا فله ،، إزيك مره من ميشو ومره تانيه من الأخ زيزو )


طبعا لكم أن تتوقعوا كيف كان حال صاحبتكم الغلبانه لما اتقللها الكملتين دوول !!



الحمد لله



(
منطقتش غيرها والله وعماله أوزع ابتسامات وخلاص ووشى زى ما انتوا متخيلين كان زى الطماطمايه ،،ماشى يا ورده بقى تحطينى فى موقف زى ده يا وحشه ده أنا صحبتك !!)



كل ده والآنسه ورده موقفانى ومذنبانى معاها


(
عماله آخد ذنوب ع الفاضى ) ،،ويا سلام بقى لو أخويه كان رايح محاضره الوقتى ولا حاجه وايجى شافنى ،،،



يا سلام ده هيبقى يوم فله ،، إيه ده صحيح ما نا فله !!!


الجزء الثانى

***

المهم لقيت ورده بتشاور لحد ،،

قلت بس الحمد لله،،


أكيد واحده من صحباتنا

وهتيجى تنقذنى من الموقف ده ....



وكانت الصدمه التانيه ..!!


_
ميدو ،، احنا هنا تعالى




( يا نهوى !! مش كفايه ميشو وزيزو ،،
مين الأخ اللى طالع لنا فى علبه البخت ده كمان ،،

يا رب استر ،،،)



المهم أخينا ميدو ده فتح حوار تانى مع أختنا ورده ،،




( شكل اليوم مش معدى ،، يا ماما !! أنا عاوزه اروح بقى !!)



(يا رب يا ورده متدخلنيش فى الحوار ده ،، أنا مبحبش التعارف ،،خلاص كرهته ،،خلصينى بقى أنا عاوزه أمشى ،،،)



مين الوجه الجديد ده ،،مش تعرفينا يا ورده ؟




( آآآآه جت من أخينا المره دى ،،، هووووووووف تعارف تانى )


أها ، دى فله،، وده ميدو يا فله صاحبنا




أهلا ،،

بابتساامه لطيفه رديت على أخينا

( ربنا يتوب عليا بقى !!)

عرضت ورده : تيجى نعمل رحله مع بعضينا يا شباب ؟


(رحله !!! مع بعضينا !!! البت صحبتى دى شكلها اتجننت والله )



رد ميشو : آه والله فكره جميله يا أم الأفكار


( أم الأفكار ..!! مين دى ؟!)


(صاحبتكم بقى واقفه فى نص هدومها وعماله تظبط فى الطرحه ،،آل يعنى الطرحه مش مظبوطه !!)


الى أن صعقها أخينا بسؤال ،،،


إيه رأيك يا فله نروح لبنان!!


لبنان .. ياااه حته واحده !!



الجزء الثالث

***

والله انا مش عارفه قلت كده ازاى طلعت والله لواحدها من غير ما أقللها ،،،زمانهم قالوا ده أبو الهول نطق ،،ما يقولوا اللى يقولوه انا عاوزه ارووووووح بقى



فجأه لقيت الجماعه دول مسخسخبن على روحهم من الضحك مش عارفه ليه هى الكلمه عجبتهم للدرجه دى يعنى !!!!


المهم اخواننا الشباب دول استأذنوا أخيرا علشان وراهم سكشن ،،،،

بس ،،،،،ايجت من عندهم الحمد لله ده انا كنت شايله هم الاستئذان من الاجتماع اللى الأخت ورده كانت متزعماه ده،،



بعد ما مشوا بقى ،،أخدت الأنسه ورده من ايديها عشان نروح ،،،،وبعد كده معدتش هتحصل انى اسمع كلامها فى حاجه تانى ،،،كان زمانى شميت شويه هوااااا




تعرفى يا فله انا مش بحب أكلم صبيان خااالص فى الكليه ،، ده ورده اللى بتقول!!!!



آه ما هو باين أصل نص شباب الدفعه ايجوا الوقفه الشاعريه اللى كانت مورطانى فيها ،،،ممكن ده عدم الاختلاط فى نظرها ،،الله أعلم بقى الاختلاط عندها هيبقى شكله عامل ازاى!!!

تـــمت
****




إيد على إيد ..نبدأ حلم جديد

إلى أحبائنا الصغار ...إلى من داهمهم ذلك المرض القاسى الذى لا يمتلك ولو قطره واحده من بحار الرحمه والشفقه ...ألا وهو سرطان الأطفال .....



أهدى إليهم كلماتى ...............



*****

بسمة حنين ..دمعة أنين..حلم السنين

قلوب تنادى.. تقول محتاجين،

وجودكم معانا

ومشتاقين،

نشوفكم ويانا

طبعا انتوا مش فاهمين بداية الرواية

كل الحكايه،،،

طفل برئ،

فجأة لقى نفسه غريق

جوه بحر كبير كبير

مسدود من كل طريق ..







لكن انتوا فاكرينه واحد عادى زينا

لو لقينا الدنيا ضلمه ننام وننسى حلمنا

لا لا ..ده طبعه مش طبعنا

ده انسان ..أيوه انسان

انسان من عالم تانى

له أحلام وله أمانى

نفسه يعيش حياه

عاوز يتمتع بصباه

عشان كده ربنا حباه

بعزيمه قويه،

تنسيه كل همومه

وإراده تتغلب،

ع المطر وغيومه .......





عرفتوا بقى بدايه الحكايه ....

ودى مش حكايته لواحده ..

ده فيه ألف روايه وروايه



وعشان كده واجب علينا

نحييهم،

ونحط ايدينا فى ايديهم ،

وده مش قليل عليهم،

ان احنا نرعاهم،

وندور على طريق النور معاهم...





ياللا ايد على ايد ..نبدأ حلم جديد

واحنا فعلا ابتدينا ..وكانت البدايه بمحمد النجار

وهييجى بعده أكيد ألف واحد هيكمل المشوار

واحنا فى الانتظار................




ملحوظه ..د/ محمد النجارعالم مصرى توصل قريبا لعلاج لمرض سرطان الرئه