كلنا كده عايزين صورة

صورة صورة صورة

كلنا كده عايزين صورة

صورة للشعب الفرحان

تحت الراية المنصورة

***

مبروك علينا مصر

مبروك يا شباب

مبروك ياشهداء

مبروك يا أحرار

مبروك لكل ولاد مصر

أول مرة أشعر بحبى الشديد الصادق لبلدى

وأشعر بمسئوليتى الكبيرة تجاهها

الآن احنا الشباب أصبحنا المحرك الرئبسى فى الدولة

أقوى من أى سلطة تانية

أثبتنا ان الشرعية الثورية هى اللى قدرت تغير مصير البلد

الوقتى كل واحد فينا وهو بيكتب جدوله اليومى يضع نيته بعد ارضاء الله تعالى ، نصرة مصر

مصر بقت مسئولة مننا

جزء لا يتجزأ من حياتنا

احنا اللى هنبنيها ونعمرها بإيدينا

علشاننا وعلشان ولادنا يتولدوا يلاقوها جنة خضرا وهما ورودها

علشان كده كل واحد فينا الآن ينظر لنفسه يشوف إيه التغيير اللى لازم يعمله يستحق البلد الطاهره دى

مصر بتبدأ من جديد

واحنا هنبدأ مع نفسنا برضه من جديد

هنحب بلدنا

هنحافظ على نظافتها

مش هنرمى ورقة فى الشارع

حنحب أهالينا

هحترم والدى وأمى وأخدمهم بعنيا

هصل رحمى الى كنت قاطعه

هتفوق فى دراستى

علشان أشرف بلدى وأرفع راسها عاليه قدام الكل شرق وغرب

هبعد عن كل ذنب كنت بعمله علشان خاطرك يا مصر

هحب زمايلى فى الدراسه وهساعدهم لو طلبوا منى ومش هخبى عنهم حاجه علشان كلنا نتفوق ونشرف مصر

هحب جيرانى وأتواصل معاهم

همشى محترمه فى الشارعلشان مفتنش ولاد بلدى ،ولو ولد مش هتحرش بأى بنت بعد كده أبداً وهحافظ عليها كأنها أختى

هتعامل بضمير فى شغلى وهتقنه ومش هخلى للواسطة والمحسوبية مكان فى دفاترى

هبقى إيجابية ومش هتهاون فى أى حاجه غلط بشوفها قدامى

هتطوع فى الأعمال الخيرية وأساعد الناس اللى محتاجه بجهدى ومالى

هحاول أحسن صورتك قدام العالم كله واللى اتشوهت فى بعض الأحيان وأثبت للعالم كله ان مصر أطهر بقاع الأرض

هصلى وهدعيلك كل يوم فى صلاتى ان ربنا ينصرك دايما ويحفظك الأيام الجاية من كل ايد طمعانه فيكى وعاوزه تلوثك

***

بحيى كل شباب مصر وعلى رأسهم الشهداء الأبطال اللى كانوا يتمنوا يبقوا فرحانين معانا فى يوم زى دا وبدعيلهم دايما فى صلاتى ربنا يرحمهم ويصبر أهاليهم

وبوصي كل مصرى ...خللى بالك من مصر وحطها فى عنيك طول ما انت عايش

اللهم ول أمورنا خيارنا ولاتولى أمورنا شرارنا

اللهم إنى أستودعك مصر أمانة فاحفظها من كل سوء