بووووووم
الحمد لله أخيراً المدفع ضرب والواحد هجم على الأكل كأنه بقاله سنه مأكلش
بعد ما خلصنا الفطار قمت أنا وأخواتى وماما علشان نصلى المغرب جماعه
(طبعاً الواحد قام بالعافيه انتوا عارفين كبسة الأكل بقى
وهنا بدأت المشاجرة الكبرى على صلاة العشاء والتراويح .. أين سنصلى اليوم ؟
ريحانه عاوزه تروح المسجد البعيد لأن صوت الإمام حلو وفيه خشوع
وروز عاوزه تروح المسجد القريب عشر دقايق كعابى كده ، وده علشان كل صحباتها بتروح تصلى هناك وعاوزه تشوفهم تحكيلهم على التقرير اليومى المفصل بتاعها من ساعة ما سابتهم
وماما حبيبة قلبنا يا دوبك عليها تنزل سلم بيتنا علشان تروح تصلى فى المسجد الصغنون اللى لازق فينا
وأنا واقفه محتاره ما بينهم ، مش عاوزه أروح مع ريحانه لأنى بصراحه مش مستعده لمشوار الألف ميل ده
(صحيح ليته كان بعيداً لكن أنا مش قادره والله
ومش هروح مع ماما ده أكيد لأن الإمام بيقول بسرعه جداً ومش بيمشى بترتيب المصحف .
المهم صفيت فى النهايه على روز ووصلنا المسجد الحمد لله بسلام آمنين
طبعاً روز استعدت للسلامات والحوارات أول ما شافت صحباتها ،
_ إزيك يا روز ؟
حلوه العبايه الى جايه بيها دى
(مش عارفين أنها شحتاها من أختها
(2)
_فطرتى إيه النهارده
_احنا عندنا عزومه بكره
_ ياريت الإمام يخلص بسرعه علشان مسلسل قضية رأى عام
_يلا يا بنات الصلاه هتبدأ
رحت وقفت جنب روز وصحباتها فى الصف التانى
" أمرى لله هما لكاكين أينعم بس الصلاه بتهدى
قعدنا نساوى فى الصفوف ساعه ، فجأه يطلعونى قدام .. يرجعونى ورا .. لأ العمود فى نص الص مينفعش اطلعوا تانى وهكذا إلى أن بدأ الإمام ( الله أكبر
وهنا بدأت المعاناه .. من حسن حظى كان واقف جنبى فى الصلاه من الناحيه التانيه ست كبيره ومعاها حفيدها
أهو أخينا ده بقى ضيع عليا صلاة العشا كلها
فجأة ألاقيه جايب الكرسى يحطوا قدامى وأنا بسجد
يشد فى الإسدال بتاعى
يلعب فى الشراب
لأ وكله كوم وأنه ياخد محفظتى ده كوم تانى
(ده فيها مصروف الأسبوع كله ..!! هئ هئ
وفضل كده لحد ما لقيت الإمام فجأه بيقول السلام عليكم
" آاااه .. ضاااعت الصلاه
قلت لروز
_ روز أنا هرجع ورا
ضحكت روز لأنها فهمت أنا عاوزه أرجع ورا ليه
رجعت تقريباً الصف الخامس وقلت فى نفسى
"الله الصف ده حلو ،، كلهم بنات قمامير زيى ،، شكلهم كده ملحقوش يجيبوا عيال
بعد ما خلصنا السنه ،بدأ الإمام فى التراويح
(3)
ويا دوبك لسه بيقرأ سورة الفاتحه وإذ بطابور من الأطفال يخترق الصف جنبى
( يا ربـــى .. تاااانى .. أستغفر الله العظيم
حاولت أركز مع الإمام لحد ما الركعتين الأولانيين يخلصوا والأمور تتحل
بعد ما انتهينا من الركعتين قعدت أدور على صف فاضى خالص مفيهوش أطفال
بصراحه بعد طول عناء ..ملقتش غير الصف الأخير كان فاضى خالص
قلت يلا بقى أمرى لله أرجع ورا وألحق آخد شويه ثواب فى بقية التراويح .
( طبعاً كل الى فى المسجد متعجب من البنت اللى واخده سياحه كده
وبدأنا الركعتين التانيين على بركة الله ،
الله أكبر ،
وكانت المفاجأه
( كوكو بان كوكو بان كل حى فى مكان
أصل العيال بيلعبوا استغمايه ورايه !!
لأ وإيه أنا كنت الحيطه اللى بيستخبوا وراها !!
ضيعتم عليا الصلاه حرام عليكو ، أعمل إيه بس ، أسيبلكوا المسجد وأطلع !!
منك لله يا روز ، انتى السبب ، مبسوطه انتى مع صحباتك يا ختى ، كان زمانى رحت مع ريحانه وريحت دماغى ع الأقل كنت هاخد ثواب
واستكملت الصلاه على مضض راضيه بأنى أكون حيطه ليهم ،
بس بعد كده هيتكشفوا علشان معادوش هيلاقوا الحيطه دى هنا تااانى
تـــــــــــــمت
5 comments:
oba,,,so nice baby wind that blow in this nice house
so nice blog
ramadan..i think 3arfa day remind u with fasting
praying to allah
nice post ...it wasn't rose steal ur concentration but ur appetite to food
extra food i guess
okay at last nice story ,way of writing so special
interesting
go forward
more &more
u will be something later
saluta
ههههههه
والله ضحكتينى يا سلمى ،،
بجد الحجات دى بتحصللنا كلنا ،،
دايماً بتقابلنى المشكله دى برضه ،،
بس بجد والله انتى عرضتيها بأسلوب شيق جدا وخفيف الظل مثلك تماما
جزاكِ الله كل خير
شكرا mirage like
لكن ما رأيك فى الكتابه بالغه العربيه أفضل ،،
جزاكم الله خيرا للمتابعه
جزاكِ الله خيرا يا بنوته ،،
انا عارفه ان المشكله فى كل مكان ،،
علشان كده حبيت أعرضها ،،
شكرا ليكى يا جميل
هههههههه بجد ضحكت و أنا بأقرأ لدرجة الناس هنا ف زامبيا حواليا بيقولو ف نفسهم إيه ياخويا الراجل الأبيض اللى بيضحك لوحده ده! _ أنا بجد كنت ناوى أقرأ الموضوع دون أن أعلق لكنك أجبرتينى ع التعليق بأسلوبك الكوميدى الساخر الرائع_ أحسنتى بجد
Post a Comment