ألف مبرووووووك لكل المصريين ،،
فعلاً والله وعملوها الرجاله ،،
شايفين الفرحه فى عيوننا عامله إزاى ،، كأن الناس مش لاقيه حاجه تفرح فيها ،،
كل الدنيا حواليهم مضلمه ، فما بيصديقوا يلاقوا حاجه يفرغوا فيها الكبت بتاعهم ،
تلاقيهم طالعين فى الشوارع يعبروا عن فرحتهم بأى شكل من الأشكال ولا هاممهم ،،
سبحان الله مع إنى مليش فى الكوره ولا بفهم فيها حاجه ،
بس البطوله دى بصراحه كنت متابعاها باستمرار ،،
أومال إيه مش كاس إفريقيا
والدنيا هتبقى مقلوبه فى البيت..
وبجد بحمد ربنا انى اتفرجت عليها لأنى اتعملت منها حجات كتيره أوى على الرغم انى معرفش أى حاجه عن قواعدها وأحكامها ،،
فى بدايه البطوله كنت ببقى مستغربه جداً للكثير من الدعاه،،
والله جزاهم الله خيراً ده أكيد وأعرف انهم افقه مننا وأعلم بأحكام الدين ،،
لكن اللى بيزعلنى انهم يطلعوا على شاشات التلفزيون ومواقع النت المختلفه بيستنكروا بشده البطوله لأ بيسنكروا رياضة كرة القدم من أصله !!
بعيد عن كل الحجات دى وبعيد عن فتوى الدعاه،،
نفسى أقول للناس كلها الرياضه مش مجرد مشاهده عقيمه مش انى اتفرج على اللاعب ده واعرف اخبار ده واشوفهم وهما بيجروا وخلاص..
بالعكس والله الرياضه دى وخاصة البطوله اللى فاتت أفادتنى كتير جداً و نفسى أقللكم الحجات الى اتعملتها واللى لازم كلنا نتعلمها ونتحلى بيها ،،
روح الجماعه ،،
أجمل روح والله ،
حب الغير وإنكار الذات
كله فى سبيل المصلحه العامه ،،
فرحه بتجمعهم بعد كل مباراه
لا ده بعد كل هدف
كله فرحان كأن كل واحد بيعتبر نفسه هو اللى جاب الهدف
لعيبه تقعد فى الاحتياطى متلعبش علشان تسيب الفرصه لغيرها وللى هى حاسه انهم هيقدروا أفضل منها على اللعب بكفاءه
وفيه لعيبه ملعبتش خالص بس الروح الصافيه ممزوجه بالفرحه بتتحسسهم انهم على أرض الملعب ،،
إخلاص النيه ،،
ليلة المباراه النهائيه عرفت إن أبو تريكه جمع اللعيبه كلهم ،، عارفين ليه ؟
علشان مفيش عمل من غير نيه وإذا فسدت النيه فسد العمل ،، والحمد لله العمل نجح لما أخلصوا نيتهم وجمعوا كلمتهم وهدفهم فى حاجه واحده بس هى إسعاد 75 مليون مصري ياما عانوا وياما تعبوا !!
شايفين حتى النيه عامله إزاى ،،
فى أصعب مواقفهم همهم إسعاد أهاليهم وشعبهم
شايفين هما فى إيه ولا فى إيه ؟
إخلاص العمل ،،
تدريب متواصل بعد كل مباراه لحد المباره اللى بعدها
شقا وتعب وإرهاق ،،
إصرار وعزيمه وصبر،،
تفاؤل وأمل ،،
كلله فى النهايه الكاس والبطوله
أجمل فرحه ،،
سجدة شكر بيختموا بيها كل مباراه ،
شفتوا الروح الإيمانيه العاليه فى المنتخب ،،
عجبنى جدا اللاعب أحمد فتحى اما سجل الهدف فى مرمى كوت ديفوار واللعيبه بتجرى عليه علشان تحضنه
قالهم إيه وأكيد كلنا لاحظناها " اسجدوا الأول "
وكلهم سجدوا ع الأرض شاكرين واحمدين ربنا وتوفيقه ليهم فى كل مباراه وكل هدف بيجيبوه ،،
وموقف تانى لللاعب أبو تريكه فى المباراه النهائيه لما الأمور اتأزمت والماتش بقى صعب ومش قادرين يسجلوا أهداف
واللعيبه بدأت تفقد أعصابها هو معملش غير حاجه واحده رفع إيديه فى السما وبدأ يدعى " يا ربـــ"
وربنا فعلا متخلاش عنه وهو اللى فرحنا وأحرز هدف البطوله ،،
إنذار شرف ،،
غزه فى أزمه ،،
حبايبنا وأخواتنا عايشين أيام صعبه هناك ،،
إيه رأيكم فى لاعب مشغول بالتدريب والبطوله وكمان فى غانا مش هنا فى مصر يخاف على أهالى غزه ويطلب مننا ان احنا نتعاطف معاهم ومش مننا احنا بس ده أعلنها قدام الجميع العالم كله شافها ،
واحنا الى قاعدين جنبها مش قادرين نتحرك ولا نتكلم كلمه !!!
ياااااه ،، بعد كل ده ومتعلمناش حاجه ولسه فيه حجات اكتر بتبان مع المواقف وبنشوفها كلنا ،،
عارفه انكم حسيتوا بنفس الإحساس اللى حسيت بيه وانتوا بتتفرجوا ،،
لأننا كلنا مصريين وكلنا مسلمين ومصر ربت فينا أصاله،،
نيلها وزع علينا طيبه نفوس وروح صافيه،،
الروح اللى خلتنا كلنا نطلع فى الشوارع نشيد باللى اخواتنا عملوه ،
روح خلتنا ننزل دموع الفرحه بعد كل هدف بيجيبوه
روح جمعت طوائف الشعب المختلفه مسلمين وأقباط
أغنياء وفقراء حكومه ومعارضه
روح نزلت كتير من بيوتهم علشان يستقبلوا اللعيبه فى المطار
روح خلتنا نتمنى اننا نكون فى غانا هناك على أرض الملعب نشاركهم فرحتهم ،،
الله عليكى يا بلدنا
والله نفسى اغنى واكتب واقول للعلم كله المصريين أهمه .. حيويه وعزم وهمه ،،
كان نفسى أكون مع اللعيبه فى غانا
كان نفسى استقبلهم فى المطار
كان نفسى اكون جنبهم افرح بفرحتهم
واكيد فيه كتير غيرى نفسهم فى كده
صحيح مقدرتش أقابلكم وأكون جنبكم،،
لكن ربنا أعلم بالفرحه اللى فى قلبى ليكوا عامله إزاى ،،
بحبك يا مصر ،،
وهفضل أحبك ،،
طول ما لسه فيكى ناس مصريين بجد ،، بيحبوكى ويخافوا عليكى ويحققوا ليكى أجمل أفراح وأعياد ،،
دمتِ بخير يا وش الخير ،،
10 comments:
الله عليكى يا سوسو والله أحلى كلام،، وألف مبروك لكل المصريين
ربنا يكرمك فعلا امتى الناس تحس ان الرياضه مش مجرد مشاهده بس ،،ومليون مبروك لمصر ولكل المصريين والله أحلى فرحه
ربنا يخليكوا ليا والله كلامكم أحلى ،،
مبارك عليكى يا أم الدنيا هذا النصر
ويا ريت بجد تكونوا استفدتوا من المواقف اللى انا ذكرتها
salamo 3alikom DOUSHURA
I cannot understand ur msg ..what is this article ? and about something is it ?
the link doesn't work ..anyway thanks 4 ur comment my dear
ربنا يسعدك و يفرحك أكتر و أكتر يا سلمى _ طول ما أنا بأقرأ ملاحظ استخدامك للغه شعريه ف نثرك حتى و إنتى بتكتبى ف الرياضه _بمعنى إن فيه جرس موسيقى خلال جملك و تقارب بين الحروف _ مش عارف إن كنتى فعلا تقصديها أم إنها بالفطره عندك؟ غير إنى لاحظت ولعك بالشعر و هو هوايتى أيضا خصوصا مع اختيارك أجمل قصيده أحبها لأفضل شاعر أحب القراءة له قصيدة سلمى (المساء) لإيليا أبو ماضى أمير الشعر عندى إخترتيها عنوانا لكى_ كما أنى فوجئت بإضافتك مشكوره لمدونتى باصص للنص الفاضى إلى قائمة مفضلتك _ أشكرك مرة أخرى وأود لو تسمحى لى بإضافة مدونتك عندى_ و مبروك لكل من فرح بكأس أفريقيا
doctor_muhammed
السلام عليكم
جزاكم الله خيراً على تلك الإشاده يا ريت بجد أكون عند حسن الظن وأكون فعلا جديره بالكلام ده ،،
الشعر والأدب عامه هوايتى منذ ابصغر وده اللى دفعنى أعمل مدونه،،
قصيده المساء أحبها جدا بصراحه أشعر انها تتحدث عنى وهى اللى حببتنى فى اسم سلمى جدا علشان كده سميت المدونه بهذا الاسم ،،
بالنسبه لإضافتى لمدونه حضرتك أعتذر ان كنت اضفتها بدون معرفه مسبقه لكن انا اخدتها من احدى قريباتى وعجبتنى جدا القصائد اللى فيها
شكرا جزيلا لكم بإذن الله سأحاول بقدر الامكان متابعه كتاباتكم،،
السلام عليكم
لا تعتذرى ده شئ أسعدنى جدا _ياريت كل الناس يضيفو المدونه بدون علمى دى مفاجئة ساره جدا_ و سأضيف مدونتك أول ما أستطيع الجلوس على جهاز _ دا لأنى خارج مصر الأن و باستعمل الموبيل ف الإتصال بالنت _ و تشرفى مدونتى بأى وقت
السلام عليكم ورحمه الله وبركاته ،،
ازيك يا سوسو ، والله بجد احنا كمان كلنا حاسينا فى الرياضه بكل اللى انتى قلتيه ده ،،
وخاصة انكار الذات وألف مبروك للكل ،،
ربنا يوفقك يا رب فى دراستك وخللى بالك من مذاكرتك لأن شكلك كده مروقه ولا فى دماغك حاجه ،، وسيبانى انا فى الثانويه العامه ملبووووخه هئ هئ هئ ،، ادعيلى بقى ،،
يلا سلام يا أختى يا حبيبتى علشان اروح أذاكررررر
هههههه يا رب يا جميل ادعيلى علطوول والله انا محتاجه دعواتكم أوى ،، وربنا معاكى انتى كمان يا رب ،، شدى حيلك بقى علشان تنوريلنا الكليه ههههههه ،،
ربنا بوفقك يا رب
يافرحة ما تمت خادها الحضري وطار
Post a Comment