أنا زعلانه من نفسى أوى ،،
إزاى كل ده يحصل لحبيبنا ، رسولنا، قدوتنا ،
وأنا قاعده ولا على بالى ومش قادره أتحرك ولا أعمل حاجه ،،
اعذرنى يا حبيبى ،،
اعذرنى إنى اتإخرت
اتأخرت كتير
الموضوع كبر
واحنا واقفين عاجزين
لا نفعل شيئاً،،
مكانش ده المفروض يحصل
لكن حصل
رسومات اتنشرت
وكلام اتقال
تضامنات اتعملت
واحنا لا شئ،،
اعذرنى علشان نسيت إنى ليا دور لازم أقوم بيه
دور إنى مسلمه
دروى غفلت عنه ،،
اهتمامات أخرى لا تساوى شيئا شغلتنى عن دروى الأساسى
دورى ودور كل فتاه وكل شاب مسلم ،،
إنى أنشر دينى على قد ما أقدر،،
وان مكانتش دى انشط مراحل حياتنا
وأكتر مرحله بنبقى فيها متحمسين
هنتكلم امتى ونتحرك امتى وناخد مواقف جامده امتى؟!!
فداك أبى وأمى يا رسول الله ،،
الحجات اللى اتنشرت دى عمرها ما هتقلل من قدرك وشأنك ،،
متفتكرش إن سكوتنا يوحى بكده ،، احنا بس عاوزين حماس عاوزين حد يحركنا ويبث فينا العزيمه والله يا رسول الله احنا كويسين وكلنا بنحبك وكلنا معاك ،،،
ده انت شأنك كبير أوى كفايه ان رب الكون كله حاميك وبيحبك ،،
أنا وصحباتى فى الجامعه هنحاول على قد ما نقدر ،،
هنقاطع
هنتكلم ونوصى
هنبعت رسايل
هنكتب وهنكتب وهنكتب
على قد ما نقدر
اعذرنى يا رسول الله الكلام ملخبط انا مش عارفه اتكلم مجهزتش أى حاجه علشان أقوللها ،،
كان نفسى أكتب ميت قصيده واملا مدونتى كلها كلام ليك لكن مهما اتكلمت ومهما قلت مش هقدر أوفى
مش هقدر أقول كلام يناسب قدرك وشأنك
كان نفسى بس أسيب بصمه ولو صغيره أقدر أقف بيها جنبك يوم القيامه وانت بتتباهى بأمتك،،
يا رب انت شايفنى الوقتى سامحنى على تقصيرى ..يا رب سامحنى على تقصيرى فى نصرة حبيبك عارفه ان المفروض أعمل أكتر وأكتر وأكتر
الكلام مش هيعمل حاجه
بدعيلك يا رب بقدرتك تكون جنب حبيبك وجنب كل المسلمين
فى العالم كله ،،
مش عاوزه أقول على اصحاب الرسومات دى أى دعوه غير انك تهديهم يا رب وبدل ما هما بيستهزئوا بديننا كده
يا رب اهديهم للإسلام ،
يا رب خليهم يعرفوا إنهم مش هيلاقوا خير ليهم إلا فيه ،،،،
الحمد لله أنى مسلمه وكفى بها نعمه
الحمد لله أنى مسلمه وكفى بها نعمه
الحمد لله أنى مسلمه وكفى بها نعمه
****
بإذن من ربه علشان يعمر الأكوان
وينور لينا طريقنا على مر الزمان
نزل برسالته يجمع ويألف القلوب
وهدفه فى كل كلمه يمحى بيها الذنوب
وطلعت شمس إسلامنا وملهاش من غروب
وفى يوم ملوش نهار
لقينا قلب قاسى مليان كله شرار
راح يكتب ويرسم بدون اعتذار
واحنا هنا واقفين من غير ما ناخد قرار
نفسى أسأل الى رسم واللى كتب واللى قال
إزاى قدرت تكتب ده عن أجمل البشر
وبدل ما توصف عنه أجمل الخصال
رحت تقول عليه كلام عمره ما حصل؟!
عاوزه أوصل رسالتى لكل المسلمين
علشان خاطرى قولولى ده يرضى مين
وبأى شرع يكتب ويرسم بأى دين
ويا ترى هنفضل لحد فين عاجزين
ونسيبه يستهزأ بحبيب المرسلين؟!
بنادى عليكى يا أعظم أمه
قومى وعمرى
رسولك ناوى يتباهى بيكى وانتى لسه بتفكرى!!
قومى فهمى الكون ده كله وقدرى
قيمه حبيب ربنا واوعى تقصرى
يلا يا مسلمين بقالنا كتير ساكتين
بإيدينا ننشر رساله نبينا ونداوى المجروحين
ونهتف بأعلى صوت فى كل وقت وكل حين
إلا حبيبنا الصادق الأمين
إلا حبيبنا الصادق الأمين
4 comments:
اول مره الحق اول تعليق ......
اولا احييكى على الموضوع الجميل وفعلا احنا مقصرين فى حق حبيبنا رسولنا صلوات الله عليه وسلامه بتمنى انه يسامحنا بجد ....
وقبل المقاطعه لازم نبدأ من نفسنا ونتعمق فى سيرته صلى الله عليه وسلم ونحاول بقدر الامكان نطبق سننه فى شتى مجالات حياتنا ...........
سامحنا يا رسولى الكريم وحسبنا الله ونعم الوكيل .....
دمتى فى حفظ الله وامنه اختى الفاضله
جزاكِ الله خيرا يا جميل والله بجد ربنا يكرمك انك اتكلمتى عن الموضوع ده ،، فداك أبى وأمى يا رسول الله ،، ربنا يجعلك كل كلمه كتبتيها فى ميزان حسناتك ان شاء الله
ربنا يوفقك
السلام عليكم ورحمه الله وبركاته ،،
أختى رموز الحياه ،،
أهلا وسهلا بك فى مدونتى والله بجد انا ببقى سعيده جدا كل اما أشوف حد جديد على المدونه لا وأل رد كمان ههههه،،
وانا عجبنى كلامك جزاك الله خيرا والله دى اهم حاجه دراسة السيره انا حاسه فعلا ان كتير محتاجين ليها ودى بجد هى اللى هتحببنا فى رسولنا اكتر واكتر ،،
والتمسك بالسنه زى ما قلتى ده أقل واجب علينا لازم نعمله ،، أسأل الله أن يستخدمنا يا رب فى طاعته ،،
ودمتى أنت أيضا بخير
شكرا لكِ
dr_angel
حبيبتى
شكرا لردك وأكرمك الله يا رب ،، آمييييييييين
السلام عليكم ورحمه الله وبركاته ،،،
أنا كمان زعلانه يا سوسو علشان أنا مش عارفه أعمل حاجه ،، منها لله الثانويه العامه اللى مورطانى معاها ديه ،، فداك أبى وأمى وروحى يا رسول الله
Post a Comment